काठमाडौं– सत्तारुढ नेपाल कम्युनिस्ट पार्टी (नेकपा)का नेता एवं सांसद भीम रावलले नेपाली बैंकलाई सिंहदरवारभित्र राख्न माग गरेका छन्। बुधवारको प्रतिनिधिसभाको बैठकमा मन्त्रीसँग प्रश्नोत्तर कार्यक्रममा भाग लिँदै नेता रावलले भारतसहितको संयुक्त लगानीमा सञ्चालित एभरेष्ट बैंक रहेको सिंहदरवारभित्र नेपाली बैंकलाई प्रवेशको अनुमति किन नदिएको प्रश्न अर्थमन्त्री युवराज खतिवडालाई गरे। जवाफमा मन्त्री खतिवडाले सिंहदरवारभित्र शाखा खोल्न वाणिज्य बैंकले प्रक्रिया सुरु गरिसकेको र सरकारले पहिल्यै अनुमति दिइसकेको जानकारी गराए।
रावलको प्रश्नः
केही समयअगाडि नेपाल बैंक लिमिटेड र राष्ट्रिय वाणिज्य बैंकको व्यवस्थापनले सरकारले हामीलाई भित्र जाने अनुमति नै दिँदैन, अनि हामीलाई विकास गर भन्छ भनेर सार्वजनिक रुपमै भनेको कुरा अर्थमन्त्रीलाई जानकारी छ कि छैन? सिंहदरवारजस्तो ठाउँमा, यो कुनै निजीलाई सहुलियतजस्तो ठाउँ होइन, यो संसद सचिवालयले, सरकारले निर्णय ठाउँ भएकाले र संसद सचिवालयले निर्णय गरेर पठाउने भएकाले नेपालको बैंकलाई भित्र जाने अनुमति अर्थ मन्त्रालयले, सरकाले किन नदिएको हो? यसको जवाफ पाउँ।
अर्थमन्त्रीको जवाफः
नेपाल सरकारले सिंहदरवारभित्र सरकारी बैंकको शाखा खोल्नुपर्छ वा अनुमति दिनुपर्छ भन्ने विषयमा यो दिइसकेको विषय छ। यसमा राष्ट्रिय वाणिज्य बैंकले आफ्नो पहल पनि गरिसकेको छ। उपयुक्त र सबैलाई पायक पर्ने स्थानको खोजीमा उसले एटिएम मेसिन राख्ने ठाउँ खोजिरहेको छ। सुरुमा एउटा ठाउँ खोजियो पनि। तर त्यो व्यवस्थित हुन सकेको छैन्। यो अनुमति दिने नदिने कुरा होइन। भैतिक व्यवस्थापन गर्न र सबैलाई सुलभ हुने ठाउँमा एटिएम राख्नका लागि मात्रै हो। बैंकलाई कार्यालय सञ्चालनका लागि ठूलो विषय छैन्। खाली भौतिक सुविधा दिने ठाउँमा सिंहदरवारको संरचनाले नभ्याएको मात्रै कुरा हो।
