घर आगनमै कोरियाः कोरिया भाषा परिक्षा पास गरेका भुवनले कोरिया नगइ नेपालमै वार्षिक २० लाख रुपैयाँ बचत गर्छन

कोरिया समाचार

सिओल

रोजगारीका लागि कोरिया युवाको रोजाइमा पर्छ । त्यहाँ रोजगारीमा जानका लागि युवाले लिखित र मौखिक दुवै परीक्षा दिनुपर्छ अर्थात् लोकसेवाजस्तै कडा मेहनत गरी परीक्षा दिएर पास गरी कोरिया जाने गरेका छन् तर यस्ता पनि युवा छन्, जो कोरिया जान छाडेर नेपालमै कृषि पेसा गरी महिनाको लाखौँ रुपैयाँ आम्दानी गरिरहेका छन् ।

ती युवामध्येका एक हुनुहुन्छ गुल्मीका २९ वर्षीय भुवन खराल । उनी गाउँमा व्यावसायिक कृषिबाट मनग्गे आम्दानी गरेर गाउँमा होइन, जिल्लामै चर्चाको पात्र बनेका छन् ।

गुल्मी छत्रकोट गाउँपालिका–१, हुँगाका खराल कोरियाका लागि नाम निकालेर रोजगारीमा जान ठिक्क परेको थिए तर उनी रोकिए । विदेशमा गएर पसिना बगाउनुभन्दा देशमै केही गर्नुपर्छ भन्ने कुरा उनको दिमागमा एकाएक आयो । कोरिया जाने निर्णयबाट पछाडि हटे।

कोरियाबाट फर्केकाले पनि त्यहाँ कडा मेहनत गर्नुपर्छ अनि मात्र कमाइ हुन्छ भन्ने सुनाएका थिए । त्यो सुनेर बरु नेपालमै त्यति मेहनत गर्छु भन्ने लागेर नै यस क्षेत्रमा लागेको उनले बताए। कोरिया जान लाग्ने खर्च उनले कृषि व्यवसायमा लगाए र आज महिनाको लाखौँ रुपैयाँ कमाइरहेका छन् ।

उनले कोरियामा कमाउनेजति रकम आफ्नै गाउँमा कमाइरहेका छन् । उनी कोरिया जानुभन्दा आफ्नै देशमा केही गर्नुपर्छ भन्ने मान्यताका साथ विगत छ वर्षदेखि रेसुङ्गा कृषि फार्म दर्ता गरी कृषि पेसामा होमिएका छन् ।

शिक्षा शास्त्रमा स्नातक पास गरेका खरालले अहिले पाल्पाको अर्गलीमा चार सय रोपनी र हुँगामा झन्डै एक सय रोपनी गरेर करिब पाँच सय रोपनी जग्गामा व्यावसायिक खेती गर्दै आएका छन् ।

उनको बारीमा अहिले काउली, बन्दा, टमाटर, खुर्सानी, मूला लटरम्म छन् । उनले त्यसबाट वार्षिक २० लाख रुपैयाँभन्दा बढी बचत गरिरहेका छन।

Leave a Reply

Your email address will not be published.